حکومت نے بانی چیئرمین پاکستان تحریک انصاف اور سابق وزیراعظم عمران خان کے علاج سے متعلق اہم پیش رفت کی تصدیق کی ہے۔
ذرائع کے مطابق عمران خان کی ہمشیرہ علیمہ خان کی جانب سے نجی ماہر امراضِ چشم سے علاج کی درخواست پر حکومت نے رضامندی ظاہر کر دی ہے۔ بتایا جا رہا ہے کہ مجوزہ نجی و فلاحی ادارے کے ماہر چشم کے نام پر بھی اتفاق ہو چکا ہے۔
اطلاعات ہیں کہ عمران خان کو جلد نجی و فلاحی ادارہ برائے امراضِ چشم منتقل کیے جانے کا امکان ہے۔ متعلقہ ادارے کو ممکنہ منتقلی سے آگاہ کر دیا گیا ہے جبکہ ماہر امراضِ چشم کو بھی علاج کے حوالے سے بریفنگ دے دی گئی ہے۔
ذرائع کا کہنا ہے کہ سابق وزیراعظم کی آمد کے پیش نظر ادارے کو ضروری انتظامات مکمل کرنے کی ہدایت بھی جاری کر دی گئی ہے۔
