منامہ: بحرین نے مبینہ ایرانی میزائل اور ڈرون حملوں کے بعد اقوام متحدہ کی سلامتی کونسل سے ہنگامی اجلاس بلانے کا مطالبہ کیا ہے۔

بحرینی وزارتِ خارجہ کی جانب سے جاری بیان میں ان حملوں کی شدید مذمت کرتے ہوئے کہا گیا ہے کہ یہ اقدامات ملک کی خودمختاری، علاقائی سلامتی اور شہریوں کے تحفظ کے خلاف منظم کارروائیوں کا حصہ ہیں۔

بیان کے مطابق یہ واقعہ کوئی الگ تھلگ معاملہ نہیں بلکہ ایک تسلسل ہے، جس پر بین الاقوامی برادری کو سنجیدگی سے غور کرنا چاہیے۔

بحرین نے اقوام متحدہ کی سلامتی کونسل سے مطالبہ کیا ہے کہ وہ اپنی ذمہ داریاں ادا کرتے ہوئے قرارداد 2817 پر مؤثر عمل درآمد یقینی بنائے اور مبینہ جارحیت کو روکنے کے لیے فوری اقدامات کرے۔

مزید کہا گیا ہے کہ ایران کی جانب سے عالمی مطالبات کو نظر انداز کیا جا رہا ہے، جس کے باعث ایک واضح اور مضبوط بین الاقوامی ردعمل ضروری ہو چکا ہے۔

بحرینی حکومت نے مؤقف اختیار کیا ہے کہ وہ خطے میں امن و استحکام کی خواہاں ہے، تاہم اپنی خودمختاری اور قومی سلامتی کے تحفظ کے لیے تمام ضروری اقدامات کا حق محفوظ رکھتی ہے۔

واضح رہے کہ مشرق وسطیٰ میں حالیہ کشیدگی کے باعث ایران اور خلیجی ممالک کے درمیان تعلقات ایک بار پھر تناؤ کا شکار ہیں، جبکہ سفارتی سطح پر صورتحال کو قابو میں لانے کی کوششیں جاری ہیں۔