تہران میں سابق ایرانی رہبرِ اعلیٰ علی خامنہ ای کی آخری رسومات کے سلسلے میں عوامی تقریبات کا باقاعدہ آغاز کر دیا گیا، جہاں ہزاروں افراد نے گرینڈ مصلیٰ میں جمع ہو کر خراجِ عقیدت پیش کیا۔
عینی شاہدین کے مطابق تابوت کی آمد سے قبل ہی بڑی تعداد میں سوگوار تقریب گاہ پہنچ چکے تھے۔ شرکا کے ہاتھوں میں سرخ جھنڈے اور مختلف پیغامات پر مشتمل پلے کارڈز بھی دیکھے گئے، جبکہ بعض افراد نے "امریکہ مردہ باد” اور "انتقام، انتقام” کے نعرے بھی لگائے۔
سرکاری ذرائع کے مطابق علی خامنہ ای کی آخری رسومات کے لیے چھ روزہ عوامی پروگرام کا آغاز ہفتے کی صبح سے ہو چکا ہے، جس کے دوران مختلف مذہبی اور سرکاری تقریبات منعقد کی جائیں گی۔
حکام کا کہنا ہے کہ تقریبات کے دوران سکیورٹی کے غیر معمولی انتظامات کیے گئے ہیں، جبکہ ملک کے مختلف علاقوں سے آنے والے زائرین کی سہولت کے لیے خصوصی اقدامات بھی کیے گئے ہیں۔
