ڈیل میں تاخیر،ٹرمپ آگ بگولہ،دوبارہ فوجی کارروائی کا حکم دےدیا- امریکی میڈیا ویب سائٹس نے دعویٰ کیا ہے کہ سابق امریکی صدر ڈونلڈ ٹرمپ نے ایران کے ساتھ جاری سفارتی مذاکرات میں پیش رفت نہ ہونے پر برہمی کا اظہار کرتے ہوئے دوبارہ فوجی کارروائیوں کا حکم دیا۔
رپورٹ کے مطابق دو سینئر امریکی اہلکاروں کے حوالے سے بتایا گیا ہے کہ ایران کی جانب سے امریکی تجاویز پر بروقت جواب نہ آنے کے باعث واشنگٹن میں مایوسی بڑھ رہی تھی، جس کے بعد صورتحال میں کشیدگی مزید بڑھ گئی۔
ذرائع کا کہنا ہے کہ حملوں سے قبل ایک واقعے کو اہم محرک قرار دیا جا رہا ہے، تاہم پس منظر میں ایران کی جانب سے مذاکرات میں تاخیر اور سفارتی رابطوں کی سست رفتاری بھی اہم وجہ بنی۔
امریکی حکام کے مطابق کارروائیوں کا مقصد خطے میں امریکی اثر و رسوخ برقرار رکھنا تھا، تاہم اس بات کا خیال رکھا گیا کہ بڑے پیمانے پر جانی نقصان نہ ہو تاکہ سفارتی حل کے امکانات مکمل طور پر ختم نہ ہوں۔
رپورٹ میں مزید کہا گیا ہے کہ کارروائی سے قبل ایرانی حکام کو ممکنہ فوجی اہداف سے آگاہ کیا گیا تھا، جبکہ اس دوران قطر کی ثالثی کے ذریعے بھی مذاکرات بحال کرنے کی کوششیں جاری رہیں۔
امریکی اہلکاروں کے مطابق حملوں سے چند گھنٹے قبل وائٹ ہاؤس میں بھی صورتحال پر غور کیا گیا اور ایران کو واضح پیغام دیا گیا کہ وقت تیزی سے ختم ہو رہا ہے۔ دوسری جانب ایرانی حکام نے مبینہ طور پر کہا کہ وہ جواب کی تیاری کر رہے ہیں اور کسی بھی حملے کی صورت میں ردعمل دیا جائے گا۔
رپورٹ کے مطابق سفارتی ذرائع کا کہنا ہے کہ اگر مذاکرات میں پیش رفت ہو جاتی تو ممکنہ طور پر معاہدہ پہلے ہی طے پا سکتا تھا، تاہم اختلافات اور تاخیر نے صورتحال کو مزید پیچیدہ بنا دیا۔
