فلسطینی ویمن فٹبال کھلاڑی کی حراست میں توسیع، مختلف حلقوں کی مذمت-فلسطینی ویمن فٹبال کھلاڑی اسرائیل نے گرفتار کرلی
فلسطینی حکام نے اطلاع دی ہے کہ فلسطینی ویمن فٹبال ٹیم کی ایک کھلاڑی رینڈ الحلاوانی کی حراست میں اسرائیلی حکام نے توسیع کر دی ہے۔
فلسطینی فٹبال ایسوسی ایشن کے مطابق 20 سالہ رینڈ الحلاوانی کو منگل کی شام پوچھ گچھ کے لیے طلب کرنے کے بعد گرفتار کیا گیا تھا۔ بعد ازاں ایک اسرائیلی عدالت نے ان کی نظربندی میں جمعہ تک توسیع کر دی۔
فلسطینی فٹبال ایسوسی ایشن نے اس اقدام کی شدید مذمت کرتے ہوئے کہا ہے کہ فلسطینی کھلاڑیوں کو منظم طریقے سے نشانہ بنایا جا رہا ہے۔
دوسری جانب اسرائیلی فوج نے مقبوضہ مغربی کنارے میں سابق قومی کھلاڑی نٹالی ابو دیہ سمیت دیگر فلسطینی خواتین کی گرفتاری کی تصدیق کی ہے۔ فوج کے مطابق ان افراد پر “دہشت گرد سرگرمیوں” سے متعلق الزامات ہیں۔
برزیت یونیورسٹی نے ان گرفتاریوں کو تعلیمی آزادی اور طلبہ کے حقوق پر حملہ قرار دیتے ہوئے سخت مذمت کی ہے۔
مذہبی و سماجی رہنماؤں نے بھی نٹالی ابو دیہ کی فوری رہائی کا مطالبہ کرتے ہوئے ان کی گرفتاری پر تشویش کا اظہار کیا ہے۔
