انڈر 19 ایشیا کپ،پاکستان نے یو اے ای کو 9 وکٹوں سے ہرا دیا-پاکستان انڈر 19 کرکٹ ٹیم نے ایشیا کپ میں بہترین کھیل کا مظاہرہ کرتے ہوئے متحدہ عرب امارات کو 9 وکٹوں سے شکست دے دی۔
عمان میں جاری ایونٹ کے میچ میں یو اے ای کی ٹیم نے پہلے بیٹنگ کرتے ہوئے 224 رنز بنائے اور اس کے تمام کھلاڑی آؤٹ ہوگئے۔ نور اللہ ایوبی نے 70 رنز کی اننگز کھیلی، جبکہ کرن رائے 47 رنز بنانے میں کامیاب رہے۔
پاکستان کی جانب سے محمد صیام نے عمدہ باؤلنگ کرتے ہوئے 3 وکٹیں حاصل کیں۔ علی رضا، رضوان اللہ اور حسنین عباس نے بھی 2،2 کھلاڑیوں کو آؤٹ کیا۔
225 رنز کے ہدف کے تعاقب میں پاکستانی بلے بازوں نے جارحانہ انداز اپنایا اور صرف 37.3 اوورز میں ایک وکٹ گنوا کر کامیابی حاصل کرلی۔
عثمان خان نے شاندار بیٹنگ کرتے ہوئے 139 رنز کی ناقابل شکست اننگز کھیلی، جبکہ جہانگیر بلال نے 60 رنز بنا کر ٹیم کی جیت میں اہم کردار ادا کیا۔
اس کامیابی کے ساتھ پاکستان انڈر 19 ٹیم نے ایشیا کپ میں اپنی برتری ثابت کرتے ہوئے 9 وکٹوں سے یادگار فتح اپنے نام کرلی۔
