سادگی سے شادی کرنے والی دلہن سوشل میڈیا پر توجہ کا مرکز بن گئی-سوشل میڈیا پر بھارت کی ریاست کیرالہ سے تعلق رکھنے والی ایک مسلمان دلہن کی شادی کی تصاویر اور ویڈیوز تیزی سے وائرل ہو رہی ہیں، جہاں صارفین ان کے سادہ انداز کو خوب سراہ رہے ہیں۔
وائرل پوسٹس کے مطابق دلہن، جن کی شناخت حبہ کے نام سے کی جا رہی ہے، نے اپنی شادی کی تقریبات میں روایتی بھاری سونے، چاندی یا مصنوعی زیورات استعمال نہ کرنے کا فیصلہ کیا۔ انہوں نے ہلکے میک اپ اور سادہ لباس کے ساتھ شادی کی تقریب میں شرکت کی، جبکہ روایتی مہندی بھی نہ لگانے کا انتخاب کیا۔
سوشل میڈیا پر گردش کرنے والی ویڈیوز میں دلہن کو بغیر بھاری زیورات کے پُراعتماد انداز میں دیکھا جا سکتا ہے۔ ان کی سادگی اور مسکراہٹ نے متعدد صارفین کی توجہ حاصل کی، جس کے بعد یہ تصاویر اور ویڈیوز مختلف پلیٹ فارمز پر تیزی سے شیئر کی جانے لگیں۔
یہ رجحان ایسے وقت میں سامنے آیا ہے جب سونے کی بڑھتی ہوئی قیمتوں کے باعث شادیوں کے اخراجات پر بھی بحث جاری ہے۔ کئی سوشل میڈیا صارفین نے دلہن کے فیصلے کو سادگی اور غیر ضروری اخراجات سے بچنے کی ایک مثبت مثال قرار دیا ہے۔
آن لائن صارفین کا کہنا ہے کہ شادی کی خوبصورتی مہنگے زیورات یا دکھاوے میں نہیں بلکہ باہمی محبت، سادگی اور خوشی میں ہوتی ہے۔ تاہم اس حوالے سے مختلف آراء بھی سامنے آ رہی ہیں اور بعض صارفین اسے ذاتی پسند کا معاملہ قرار دے رہے ہیں۔
