سیشن عدالت وسطی نے یوٹیوبر رجب بٹ کی عبوری ضمانت میں تیس مارچ تک توسیع کر دی ہے۔ یہ سماعت شعائر اسلام کی بے حرمتی کے مقدمے کی گئی۔
عبوری ضمانت پر رہا ملزم رجب بٹ عدالت میں پیش ہوئے۔ مدعی کے وکیل نے موقف اختیار کیا کہ مقررہ وقت ساڑھے آٹھ بجے تھا لیکن ملزم ساڑھے نو بجے پیش ہوئے، اور اس بنیاد پر ضمانت منسوخ کرنے کی درخواست کی۔ مدعی وکیل کا کہنا تھا کہ وہ شواہد پیش کرنے کے لیے پوری تیاری کر چکے ہیں، تاہم ملزم کے وکیل پیش نہیں ہوئے۔
ملزم کے وکیل نے عدالت کو آگاہ کیا کہ وکیل میاں علی اشفاق آفیشل چھٹیوں پر ہیں۔ عدالت نے اظہار برہمی کرتے ہوئے کہا کہ پہلے بھی وکیل پیش نہیں ہوئے تھے اور کہا کہ باقاعدہ درخواست جمع کروائی جائے۔
بعد ازاں ملزم کے وکلاء نے سماعت ملتوی کرنے کی درخواست کی، جسے منظور کرتے ہوئے رجب بٹ کی عبوری ضمانت میں تیس مارچ تک توسیع کر دی گئی۔
ملزم رجب بٹ کے خلاف تھانہ حیدری مارکیٹ میں مقدمہ درج ہے۔
