ارلنگ ہالینڈ سے مشابہ روسی ماڈل سوشل میڈیا پر توجہ کا مرکز بن گئیں-ناروے کے اسٹار فٹبالر ارلنگ ہالینڈ کی غیر معمولی کارکردگی کے ساتھ ساتھ ان سے مشابہت رکھنے والی روسی ماڈل انستاشیا کوسترومیتینا بھی ان دنوں سوشل میڈیا پر خاصی مقبول ہو رہی ہیں۔ فٹبال شائقین اور سوشل میڈیا صارفین انہیں ہالینڈ کا "لیڈی ورژن” قرار دے رہے ہیں۔

رپورٹس کے مطابق انستاشیا کوسترومیتینا پیشہ ور ماڈل اور سوشل میڈیا انفلوئنسر ہیں، جو مختلف معروف برانڈز کے ساتھ کام کر چکی ہیں۔ حالیہ دنوں میں ان کی ایک ویڈیو غیر معمولی طور پر وائرل ہوئی، جس میں وہ ارلنگ ہالینڈ کے انداز، چہرے کے تاثرات اور باڈی لینگویج کی نقل کرتی دکھائی دیتی ہیں۔

ویڈیو میں انستاشیا نے اپنے سنہرے بال بھی اسی انداز میں باندھے تھے جس طرح ارلنگ ہالینڈ اکثر میچوں کے دوران نظر آتے ہیں۔ ان کے چہرے کے خدوخال، مسکراہٹ، آنکھوں کے تاثرات اور انداز نے سوشل میڈیا صارفین کو حیران کر دیا، جس کے بعد یہ ویڈیو مختلف پلیٹ فارمز پر تیزی سے پھیل گئی۔

میڈیا رپورٹس کے مطابق اس ویڈیو کو 110 ملین سے زائد مرتبہ دیکھا جا چکا ہے، جبکہ لاکھوں صارفین اس پر اپنے ردعمل کا اظہار کر چکے ہیں۔ سوشل میڈیا پر متعدد صارفین نے دلچسپ تبصرے کرتے ہوئے انستاشیا کو "ہالینڈ کی گمشدہ بہن” اور "لیڈی ہالینڈ” جیسے القابات بھی دیے۔

انستاشیا کا کہنا ہے کہ ابتدا میں وہ اپنی اس مشابہت کو زیادہ اہمیت نہیں دیتی تھیں، تاہم وقت کے ساتھ انہوں نے اسے مثبت انداز میں قبول کر لیا۔ ان کے مطابق کئی برسوں سے لوگ ان کا موازنہ ارلنگ ہالینڈ سے کرتے آ رہے ہیں اور اب وہ اسے اپنی پہچان کا ایک دلچسپ پہلو سمجھتی ہیں۔

دوسری جانب فٹبال شائقین کی توجہ اس وقت ناروے اور انگلینڈ کے اہم مقابلے پر بھی مرکوز ہے، جس سے قبل ارلنگ ہالینڈ اور انستاشیا کی مشابہت ایک مرتبہ پھر سوشل میڈیا پر موضوعِ بحث بنی ہوئی ہے۔