اقوام متحدہ میں ایران کا امریکا کے خلاف مؤقف-ایران نے اقوام متحدہ سے مطالبہ کیا ہے کہ امریکا کے مبینہ غیرقانونی اقدامات کا نوٹس لیتے ہوئے اسے بین الاقوامی قوانین کے تحت جواب دہ بنایا جائے اور اس سلسلے میں مؤثر اقدامات کیے جائیں۔
اقوام متحدہ میں ایران کے مستقل مندوب امیر سعید ایروانی نے سلامتی کونسل کے ہنگامی اجلاس کے بعد میڈیا سے گفتگو میں کہا کہ امریکا اپنے اقدامات کے نتیجے میں پیدا ہونے والے تمام قانونی اور سیاسی اثرات کا خود ذمہ دار ہے۔
انہوں نے کہا کہ عالمی ادارے کو چاہیے کہ وہ بین الاقوامی قوانین کی پاسداری کو یقینی بنائے اور ایسے اقدامات کرے جو مستقبل میں کسی بھی مبینہ غیرقانونی کارروائی کی روک تھام میں مددگار ثابت ہوں۔ ان کے مطابق تمام رکن ممالک پر بھی یہ ذمہ داری عائد ہوتی ہے کہ وہ عالمی قوانین اور اقوام متحدہ کے چارٹر کا احترام یقینی بنائیں۔
ایرانی مندوب نے زور دیا کہ عالمی برادری کو بین الاقوامی قانون کے تحفظ اور خطے میں امن و استحکام برقرار رکھنے کے لیے فعال کردار ادا کرنا چاہیے۔
یہ بیان ایسے وقت میں سامنے آیا ہے جب امریکا اور ایران کے درمیان حالیہ کشیدگی، خصوصاً آبنائے ہرمز سے متعلق پیش آنے والے واقعات، عالمی سطح پر تشویش کا باعث بنے ہوئے ہیں، جس کے تناظر میں اقوام متحدہ کی سلامتی کونسل کا ہنگامی اجلاس بھی طلب کیا گیا۔
