آر فور ممالک کی سعودی عرب سے یکجہتی، حوثی حملوں کی مذمت -استنبول میں پاکستان، ترکیہ، سعودی عرب اور مصر پر مشتمل آر فور ممالک کے وزرائے خارجہ نے سعودی عرب کے ساتھ یکجہتی کا اظہار کرتے ہوئے اس کی خودمختاری اور علاقائی سالمیت کی حمایت کا اعادہ کیا ہے۔ چاروں ممالک نے سعودی عرب کو نشانہ بنانے والے حوثی حملوں کی مذمت بھی کی۔
ترجمان دفتر خارجہ کے مطابق آر فور ممالک کے وزرائے خارجہ کا چھٹا اجلاس استنبول میں منعقد ہوا، جس میں پاکستان کے نائب وزیراعظم اور وزیر خارجہ اسحاق ڈار، ترکیہ کے وزیر خارجہ خاقان فیدان، سعودی وزیر خارجہ شہزادہ فیصل بن فرحان اور مصر کے وزیر خارجہ ڈاکٹر بدر عبدالعاطی نے شرکت کی۔
اجلاس میں نیویارک میں ہونے والی گزشتہ ملاقات کے بعد خطے میں پیش آنے والی پیش رفت کا جائزہ لیا گیا۔ شرکا نے مشرق وسطیٰ کی صورت حال، سیکیورٹی چیلنجز اور جاری تنازعات پر تبادلہ خیال کیا۔
ترجمان دفتر خارجہ کے مطابق اجلاس میں تمام ممالک کی خودمختاری کے احترام کی اہمیت پر زور دیا گیا۔ وزرائے خارجہ نے علاقائی رابطہ کاری بہتر بنانے، سفارتی کوششوں کو آگے بڑھانے اور خطے میں پائیدار امن، سلامتی اور استحکام کے لیے مشترکہ اقدامات جاری رکھنے پر اتفاق کیا۔
ای فور اور آر فور ممالک کے وزرائے خارجہ کا اجلاس
استنبول میں آر فور ممالک، یعنی پاکستان، ترکیہ، سعودی عرب اور مصر، اور ای فور ممالک، یعنی فرانس، جرمنی، اٹلی اور برطانیہ، کے وزرائے خارجہ کے درمیان بھی اجلاس ہوا، جس میں اسحاق ڈار نے پاکستان کی نمائندگی کی۔
ترجمان دفتر خارجہ کے مطابق اجلاس میں خلیجی خطے کی صورت حال کے سماجی اور اقتصادی اثرات کا جائزہ لیا گیا۔ شرکا نے خطے کو درپیش امن و سلامتی کے چیلنجز سے نمٹنے کے لیے سفارتی کوششیں فوری طور پر تیز کرنے کی ضرورت پر زور دیا۔
اسحاق ڈار نے اجلاس میں شریک وزرائے خارجہ کو بتایا کہ پاکستان کشیدگی کم کرنے، بدامنی کے پھیلاؤ کو روکنے اور امن کے فروغ کے لیے سفارت کاری اور ثالثی کی کوششیں کر رہا ہے۔ اجلاس میں شریک ممالک نے اس معاملے پر باہمی رابطے جاری رکھنے پر اتفاق کیا۔
اسحاق ڈار کی جرمن وزیر خارجہ سے ملاقات
نائب وزیراعظم اور وزیر خارجہ اسحاق ڈار نے استنبول میں اجلاس کے موقع پر جرمنی کے وزیر خارجہ یوہان واڈے فول سے بھی ملاقات کی۔ ملاقات میں پاکستان اور جرمنی کے دوطرفہ تعلقات اور باہمی دلچسپی کے امور پر گفتگو ہوئی۔
اسحاق ڈار نے مسلسل رابطوں اور مختلف شعبوں میں تعاون کے ذریعے دونوں ممالک کے تعلقات مزید مضبوط بنانے کی خواہش کا اظہار کیا۔ دونوں رہنماؤں نے علاقائی اور عالمی صورت حال پر بھی تبادلہ خیال کیا اور چیلنجز سے نمٹنے کے لیے مذاکرات، سفارت کاری اور مسلسل رابطوں کی اہمیت پر زور دیا۔
اسحاق ڈار نے آر فور ممالک کے ساتھ جرمنی، فرانس، اٹلی اور برطانیہ کے تعمیری روابط کا خیرمقدم کرتے ہوئے اہم علاقائی معاملات پر مسلسل مشاورت اور سفارتی رابطہ کاری جاری رکھنے کی ضرورت پر زور دیا۔
