عباس عراقچی نے تہران میں جنوبی کوریا کے خصوصی ایلچی چانگ بیونگ ہا سے ملاقات کی، جس میں خطے کی صورتحال اور بڑھتی ہوئی کشیدگی پر تبادلہ خیال کیا گیا۔
ملاقات کے دوران عباس عراقچی نے کہا کہ خلیجی خطے اور آبنائے ہرمز میں عدم استحکام کی بنیادی وجہ امریکا اور اسرائیل کی “جارحیت” ہے، جو خطے کے امن کے لیے خطرہ بن رہی ہے۔
ایرانی حکومت کی جانب سے جاری بیان کے مطابق عراقچی نے جنوبی کورین ایلچی کو ایران کے خلاف حالیہ جنگ کے دوران امریکا اور اسرائیل کے مبینہ “جرائم” سے آگاہ کیا اور عالمی برادری پر زور دیا کہ وہ ان حملوں کے خلاف واضح اور مضبوط مؤقف اختیار کرے۔
انہوں نے کہا کہ ایران ایک ساحلی ریاست ہونے کے ناطے اپنی سلامتی اور قومی مفادات کے تحفظ کے لیے بین الاقوامی قانون کے تحت اقدامات کر رہا ہے، اور کسی بھی ممکنہ نتائج کی ذمہ داری حملہ آوروں پر عائد ہوتی ہے۔
