تہران: ایرانی پارلیمنٹ کے اسپیکر اور سینئر مذاکرات کار محمد باقر قالیباف نے ان خبروں کی تردید کی ہے جن میں دعویٰ کیا گیا تھا کہ بین الاقوامی جوہری توانائی ایجنسی (آئی اے ای اے) کو ایران کے بمباری سے متاثرہ جوہری مراکز تک رسائی دی جا رہی ہے۔
اپنے بیان میں انہوں نے واضح کیا کہ متاثرہ جوہری تنصیبات تک آئی اے ای اے کے معائنہ کاروں کو رسائی دینے کی اطلاعات درست نہیں ہیں اور اس حوالے سے گردش کرنے والی خبریں حقیقت پر مبنی نہیں۔
محمد باقر قالیباف کے مطابق فی الحال بین الاقوامی معائنہ کاروں کو صرف دو مقامات، بوشہر نیوکلیئر پاور پلانٹ اور تہران ری ایکٹر تک محدود رسائی حاصل ہے، جبکہ دیگر حساس جوہری تنصیبات تک رسائی کی اجازت نہیں دی گئی۔
انہوں نے کہا کہ ایران اپنے قومی مفادات اور سلامتی کو مدنظر رکھتے ہوئے جوہری تنصیبات سے متعلق فیصلے کر رہا ہے، جبکہ اس معاملے پر سرکاری مؤقف کے علاوہ کسی بھی غیر مصدقہ اطلاع پر یقین نہیں کیا جانا چاہیے۔
