امریکا ایران کشیدگی،عالمی مارکیٹ میں خام تیل سستا ہوگیا

امریکا ایران کشیدگی،عالمی مارکیٹ میں خام تیل سستا ہوگیا-امریکا اور ایران کے درمیان جاری کشیدگی کے باعث عالمی مارکیٹ میں خام تیل کی قیمتوں میں کمی ریکارڈ کی گئی ہے۔

سرمایہ کار خطے میں ممکنہ فوجی کارروائیوں اور اس کے نتیجے میں تیل کی عالمی سپلائی متاثر ہونے کے خدشات کا جائزہ لے رہے ہیں۔

جمعرات کو برینٹ خام تیل کے مستقبل کے سودوں کی قیمت میں 43 سینٹ کمی ہوئی، جس کے بعد برینٹ کی قیمت 0.45 فیصد کمی کے ساتھ 95.20 ڈالر فی بیرل ہوگئی۔

اسی طرح امریکی خام تیل ویسٹ ٹیکساس انٹرمیڈیٹ (WTI) کے نرخ بھی 24 سینٹ کم ہوئے۔ 0.26 فیصد کمی کے بعد WTI خام تیل 90.77 ڈالر فی بیرل کی سطح پر آگیا۔

مارکیٹ میں سرمایہ کار امریکا اور ایران کے درمیان بڑھتی ہوئی کشیدگی پر گہری نظر رکھے ہوئے ہیں۔ خاص طور پر اس بات کا جائزہ لیا جا رہا ہے کہ ممکنہ فوجی تصادم کی صورت میں مشرق وسطیٰ سے عالمی منڈی تک تیل کی ترسیل کس حد تک متاثر ہوسکتی ہے۔

ماہرین کے مطابق خطے میں کشیدگی میں مزید اضافہ تیل کی قیمتوں میں دوبارہ تیزی کا سبب بن سکتا ہے، جبکہ موجودہ صورتحال میں سرمایہ کار سپلائی کے ممکنہ خطرات اور عالمی توانائی مارکیٹ پر اس کے اثرات کو مدنظر رکھتے ہوئے محتاط انداز اختیار کیے ہوئے ہیں۔