اسلام آباد — پاکستان ٹیلی کمیونیکیشن کمپنی لمیٹڈ نے تصدیق کی ہے کہ اس کے زیرِ استعمال ایک سب میرین کیبل میں خرابی پیدا ہوگئی ہے، جس کی مرمت کا عمل آج سے شروع کیا جا رہا ہے۔
ترجمان کے مطابق یہ مرمتی کام انٹرنیشنل کیبل کنسورشیم کی نگرانی میں کیا جائے گا اور اس کے 20 اپریل تک جاری رہنے کا امکان ہے۔ اس دوران ملک بھر میں انٹرنیٹ سروس جزوی طور پر متاثر رہ سکتی ہے۔
پی ٹی سی ایل کا کہنا ہے کہ خاص طور پر شام کے اوقات میں صارفین کو انٹرنیٹ کی رفتار میں کمی کا سامنا کرنا پڑ سکتا ہے، تاہم سروس مکمل طور پر بند نہیں ہوگی۔
ترجمان نے صارفین کو پیش آنے والی عارضی پریشانی پر معذرت کرتے ہوئے یقین دہانی کرائی ہے کہ مرمت کا عمل جلد مکمل کرکے سروس کو معمول پر لایا جائے گا۔
