اسلام آباد: پاک افغان سرحد پر کشیدگی برقرار ہے جہاں سیکیورٹی ذرائع کے مطابق افغان طالبان کی مبینہ بلااشتعال کارروائیوں کے جواب میں پاکستان کی جانب سے آپریشن ’’غضب للحق‘‘ جاری ہے۔ ذرائع کا کہنا ہے کہ سرحدی علاقوں میں مخصوص اہداف کو نشانہ بنایا جا رہا ہے۔
سیکیورٹی حکام کے مطابق جوابی کارروائی کے دوران مخالف ٹھکانوں کو نقصان پہنچا جبکہ بعض چیک پوسٹیں تباہ کی گئیں۔ چترال سیکٹر میں ایک چیک پوسٹ کو نشانہ بنانے کا دعویٰ کیا گیا ہے۔ اسی طرح ناوگئی سیکٹر باجوڑ، تیراہ خیبر، ضلع مہمند اور ارندو سیکٹر میں بھی کارروائی کی اطلاعات ہیں۔ باجوڑ میں دو چوکیوں کی تباہی کا بھی دعویٰ سامنے آیا ہے۔
ذرائع کے مطابق افغان جانب سے کواڈ کاپٹرز کے ذریعے پاکستانی چیک پوسٹوں کو نشانہ بنانے کی کوشش کی گئی جسے ناکام بناتے ہوئے مبینہ طور پر ڈرونز مار گرائے گئے۔ حکام کا کہنا ہے کہ زمینی کارروائی میں چھوٹے اور بھاری ہتھیاروں کا استعمال کیا جا رہا ہے جبکہ ڈرونز کے ذریعے بھی اہداف کو نشانہ بنایا گیا۔
سیکیورٹی ذرائع نے دعویٰ کیا ہے کہ جھڑپوں میں افغان طالبان کے 22 اہلکار ہلاک ہوئے، تاہم ان اطلاعات کی آزاد ذرائع سے تصدیق نہیں ہوسکی۔ دوسری جانب سوشل میڈیا پر مختلف دعوے اور ویڈیوز گردش کر رہی ہیں جنہیں حکام نے گمراہ کن قرار دیا ہے۔
حکام کا کہنا ہے کہ پاکستان کی سیکیورٹی فورسز سرحدی دفاع کے لیے مکمل طور پر تیار ہیں اور کسی بھی جارحیت کا فوری اور سخت جواب دیا جائے گا۔ صورتحال پر مسلسل نظر رکھی جا رہی ہے۔
