انٹرنیشنل کرکٹ کونسل (آئی سی سی) نے ٹی 20 ورلڈ کپ 2026 کا آفیشل سونگ جاری کر دیا ہے۔ آئی سی سی کی سوشل میڈیا پوسٹ کے مطابق یہ ترانہ دنیا کرکٹ کے بڑے ایونٹ کے لیے تیار کیا گیا ہے اور تمام آڈیو پلیٹ فارمز پر دستیاب ہے۔ سونگ کا ٹائٹل ’فل دا تھرل‘ ہے۔
دوسری جانب آئی سی سی ٹی 20 ورلڈ کپ کی ٹرافی بھی پاکستان پہنچ گئی ہے۔ لاہور کے کنیئرڈ کالج میں ٹرافی کی نمائش کی گئی، جہاں طالبات نے جوش و خروش کا مظاہرہ کیا۔ ٹیسٹ کرکٹر حسن علی نے بھی ٹرافی کے ساتھ تصاویر بنوائیں۔
ٹی 20 ورلڈ کپ ٹرافی کی مقامی شاپنگ مال میں بھی نمائش کی جائے گی اور پاکستان اور آسٹریلیا کے درمیان میچوں کے دوران اسٹیڈیم اور اس کے باہر پی سی بی کی شاپ پر فینز کے لیے ٹرافی دیکھی جا سکے گی۔
