ڈیانا نے احمد تنویر کو بے قصور قرار دے دیا-لاہور میں غیر ملکی خاتون ڈیانا سے متعلق کیس میں اہم پیش رفت سامنے آئی ہے، جہاں خاتون نے اپنے تازہ ویڈیو بیان میں احمد تنویر کو بےقصور قرار دیتے ہوئے ان کے خلاف الزامات کی تردید کر دی ہے۔
ڈیانا کے مطابق احمد تنویر کا ان کے ساتھ مبینہ زیادتی کے واقعے سے کوئی تعلق نہیں۔ انہوں نے یہ بھی کہا کہ ملزم نے نہ ان کے ساتھ زیادتی کی اور نہ ہی ان کے موبائل فون لیے۔ خاتون نے دعویٰ کیا کہ انہوں نے اس سے قبل دباؤ میں آکر بیانات دیے تھے۔
اطلاعات کے مطابق ڈیانا نے آذربائیجان کے سفارتخانے سے متعلق دستاویزات کے ذریعے بھی احمد تنویر کو بےقصور قرار دیا ہے۔ دوسری جانب پولیس نے احمد تنویر کو عبوری ضمانت منظور ہونے کے باوجود گرفتار کر لیا تھا۔
یاد رہے کہ 4 اکتوبر کو 22 سالہ آذربائیجانی خاتون ڈیانا رومک قزی باغییوا کو پولیس کے تین افسران کے ہمراہ باکو روانہ کیا گیا تھا۔ خاتون کو پرواز پی کے 159 کے ذریعے روانہ کیا گیا، جبکہ اے ایس پی ڈیفنس سمیت تین پولیس افسران نے ایئرپورٹ پر ان کی بورڈنگ کے مراحل مکمل کروائے۔
کیس میں سامنے آنے والے نئے بیان کے بعد معاملے کی قانونی صورت حال اور آئندہ کارروائی اہمیت اختیار کر گئی ہے۔ تاہم مقدمے کے حتمی نتیجے کا تعین متعلقہ تفتیشی اور عدالتی کارروائی سے ہوگا۔
