احتجاج کا حق حکومت گرانے کیلئے استعمال نہیں ہو سکتا: IHC

اسلام آباد ( نیوز ڈیسک) اسلام آباد ہائی کورٹ نے تحریک انصاف کے لانگ مارچ سے متعلق کیس کی سماعت کرتے ہوئے اہم فیصلہ جاری کیا ہے۔ عدالت نے واضح کیا ہے کہ آئین ہر شہری کو احتجاج کا حق دیتا ہے، مگر اس حق کو کسی جائز اور منتخب حکومت کا تختہ الٹنے کے لیے استعمال نہیں کیا جا سکتا۔

چیف جسٹس عامر فاروق نے یہ ریمارکس تحریک انصاف کی درخواست پر دیے، جس میں انہوں نے لانگ مارچ کے دوران راستے کھولنے اور تحفظ فراہم کرنے کی استدعا کی تھی۔ عدالت نے اپنے فیصلے میں مزید کہا کہ آئینی طور پر قائم حکومت کو غیر آئینی طریقے سے ہٹانے کی کوشش قانون کی خلاف ورزی ہوگی۔

عدالت نے متعلقہ حکام کو ہدایت کی ہے کہ وہ احتجاج کرنے والوں کے حقوق کا تحفظ کریں، لیکن اس بات کو یقینی بنائیں کہ کسی بھی صورتحال میں ریاستی اداروں اور عوامی املاک کو نقصان نہ پہنچایا جائے اور امن و امان کی صورتحال برقرار رہے۔