ملتان میں غربت کی ایک انتہائی افسوسناک مثال سامنے آئی، جہاں مالی تنگی کے باعث ایک باپ اپنے نوجوان بیٹے کی میت بغیر کفن کے قبرستان لے پہنچا۔
پولیس کے مطابق رشید آباد قبرستان میں بغیر کفن تدفین کی اطلاع ملتے ہی لوہاری گیٹ تھانے کی ٹیم فوری طور پر موقع پر پہنچی۔ اہلکاروں نے دیکھا کہ متوفی کے والد شدید مالی مشکلات کے باعث کفن کا انتظام نہیں کر سکے تھے اور انہوں نے مجبوری میں بیٹے کی میت کو صرف ایک چادر میں لپیٹ رکھا تھا۔
متوفی کے والد نے پولیس کو بتایا کہ ان کے پاس کفن و دفن کے اخراجات پورے کرنے کے لیے رقم موجود نہیں تھی، جس کے باعث وہ انتہائی بے بسی کی کیفیت میں تھے۔
صورتحال دیکھتے ہوئے لوہاری گیٹ پولیس نے انسانی ہمدردی کا مظاہرہ کیا اور اپنی ذاتی رقم سے کفن کا انتظام کیا۔ اس کے بعد مرحوم کی تدفین اسلامی طریقہ کار کے مطابق مکمل کرائی گئی۔
پولیس حکام کا کہنا ہے کہ متاثرہ خاندان کو فوری مالی معاونت بھی فراہم کی گئی اور تدفین کے تمام ضروری انتظامات یقینی بنائے گئے تاکہ غمزدہ خاندان کو اس مشکل گھڑی میں سہارا دیا جا سکے۔
