اسلام آباد: ایران کے اعلیٰ سطحی وفد نے پاکستان آمد کے دوران ایک جذباتی اور دل دہلا دینے والا منظر پیش کیا، جس نے سب کو افسردہ کر دیا۔
تفصیلات کے مطابق ایران سے اسلام آباد آنے والی پرواز میں وفد نے امریکی میزائل حملے میں شہید ہونے والے بچوں کی یاد میں منفرد خراجِ عقیدت پیش کیا۔ طیارے کے اندر شہید بچوں کی تصاویر، خون آلود بستے اور جوتے آویزاں کیے گئے، جس نے فضا کو سوگوار بنا دیا۔
یہ المناک واقعہ 28 فروری 2026 کو جنوبی ایران کے شہر میناب میں پیش آیا تھا، جہاں ایک ابتدائی اسکول پر میزائل حملہ ہوا۔ اس حملے میں 100 سے زائد بچے اور اساتذہ جان کی بازی ہار گئے تھے۔ ایرانی حکام کے مطابق یہ حملہ ایک سنگین جنگی جرم ہے، جبکہ امریکی حکام کا مؤقف ہے کہ یہ پرانے ہدفی ڈیٹا کی بنیاد پر ہونے والی غلطی تھی۔
سوشل میڈیا پر وائرل ویڈیوز اور تصاویر میں دیکھا جا سکتا ہے کہ ایرانی وفد نے طیارے کو ایک عارضی یادگار میں تبدیل کر دیا تھا، جہاں شہداء کو یاد کیا گیا اور انصاف کا مطالبہ کیا گیا۔
ذرائع کے مطابق یہ اقدام پاکستان میں جاری جنگ بندی مذاکرات کے تناظر میں کیا گیا، تاکہ عالمی برادری کی توجہ اس سانحے کی جانب مبذول کرائی جا سکے۔ ایرانی حکام کا کہنا ہے کہ یہ صرف یادگار نہیں بلکہ مظلوم بچوں کے لیے انصاف کی پکار ہے۔
پاکستان میں جاری امن مذاکرات کے دوران اس واقعے نے ماحول کو مزید سنجیدہ بنا دیا ہے اور خطے میں امن و انصاف کے مطالبات کو تقویت دی ہے۔
