وزیراعظم کی پی ٹی آئی کو پھر مذاکرات کی پیشکش،دھرنے ختم کرنے کا مطالبہ

وزیراعظم کی پی ٹی آئی کو پھر مذاکرات کی پیشکش،دھرنے ختم کرنے کا مطالبہ-وزیراعظم شہباز شریف نے پاکستان تحریک انصاف کو ایک بار پھر مذاکرات کی دعوت دیتے ہوئے کہا ہے کہ اگر مارچ اور دھرنے ختم کیے جائیں تو حکومت بات چیت کے لیے تیار ہے۔

اسلام آباد میں ایک تقریب سے خطاب کرتے ہوئے وزیراعظم نے کہا کہ حکومت نے گزشتہ ڈھائی سال کے دوران مسلسل محنت اور ٹیم ورک کے ذریعے ملکی معیشت کو استحکام کی جانب گامزن کیا۔ ان کے مطابق میکرو اکنامک استحکام کا حصول آسان نہیں تھا اور اس کے لیے طویل محنت کرنا پڑی۔

شہباز شریف نے کہا کہ پاکستان کو ترقی اور خوشحالی کی راہ پر آگے لے جانا قوم کی خواہش ہے، تاہم احتجاج اور دھرنوں کی سیاست سے معاشی سرگرمیاں متاثر ہونے کا خدشہ ہے۔

وزیراعظم کے مطابق احتجاج کے باعث برآمدات، درآمدات اور مینوفیکچرنگ کے شعبے متاثر ہو سکتے ہیں، جبکہ سیاسی احتجاج کا سب سے زیادہ نقصان ملکی معیشت کو پہنچے گا۔

انہوں نے کہا کہ حکومت نے مذاکرات کے ذریعے معاملات حل کرنے کی کوشش کی، تاہم بدقسمتی سے یہ کوششیں کامیاب نہ ہوسکیں۔

وزیراعظم شہباز شریف نے پی ٹی آئی سے مطالبہ کیا کہ دھرنے اور مارچ ختم کیے جائیں اور ملک میں سیاسی استحکام کو موقع دیا جائے۔ ان کا کہنا تھا کہ ترقی کے عمل کو دوبارہ روکنا ملک کے مفاد میں نہیں۔

شہباز شریف نے سوال اٹھایا کہ کیا ترقی کے پہیے کو روکنا اور پاکستان کی عالمی ساکھ کو متاثر کرنا ملک دشمنی نہیں؟ انہوں نے کہا کہ اگر مارچ اور دھرنے ختم کیے جائیں تو حکومت پی ٹی آئی کے ساتھ مذاکرات کے لیے تیار ہے۔