سینٹکام کا ایران میں 13ویں رات فضائی حملوں کا دعویٰ-امریکی سینٹرل کمانڈ (سینٹکام) نے دعویٰ کیا ہے کہ اس نے ایران کے خلاف مسلسل 13ویں رات بھی فضائی کارروائیاں کی ہیں، جن کا مقصد خطے میں بحری سلامتی کو درپیش خطرات میں کمی لانا تھا۔
سینٹکام کی جانب سے جاری بیان کے مطابق حالیہ فضائی حملوں میں ایران کے فوجی کمانڈ مراکز، ڈرون تنصیبات، مواصلاتی نظام، ساحلی نگرانی کے مراکز اور بحری عسکری صلاحیتوں کو نشانہ بنایا گیا۔
امریکی حکام کا کہنا ہے کہ ان کارروائیوں کا مقصد آبنائے ہرمز سے گزرنے والے تجارتی اور شہری بحری جہازوں کے لیے ممکنہ خطرات کو کم کرنا اور بین الاقوامی بحری آمد و رفت کے تحفظ کو یقینی بنانا ہے۔
بیان میں کہا گیا کہ ایران کی اسلامی انقلابی گارڈ کور (IRGC) کی حالیہ سرگرمیوں کے باوجود آبنائے ہرمز بحری ٹریفک کے لیے کھلی ہوئی ہے اور تجارتی جہاز معمول کے مطابق اس اہم سمندری راستے سے گزر رہے ہیں۔
سینٹکام کے مطابق مشرقِ وسطیٰ میں اس وقت 50 ہزار سے زائد امریکی فوجی اہلکار مختلف مقامات پر تعینات ہیں اور خطے میں امریکی فوجی کارروائیاں جاری ہیں۔
تاہم امریکی دعوؤں پر ایران کی جانب سے فوری طور پر کوئی باضابطہ ردعمل سامنے نہیں آیا، جبکہ آزاد ذرائع سے بھی ان دعوؤں کی مکمل تصدیق نہیں ہو سکی۔
