وزیراعظم سے ایم کیو ایم ملاقات،بلدیاتی مسودے کی حمایت۔ ایم کیو ایم پاکستان کے وفد نے وزیراعظم شہباز شریف سے ملاقات کی اور 27 ویں آئینی ترمیم میں بلدیاتی حکومتوں کو مزید اختیارات دینے کی درخواست کی۔
ملاقات میں کنوینر ڈاکٹر خالد مقبول صدیقی کی قیادت میں ایم کیو ایم کے سات رکنی وفد نے حصہ لیا، جس میں گورنر سندھ کامران خان ٹیسوری، وفاقی وزیر صحت سید مصطفیٰ کمال، اور دیگر ارکان شامل تھے۔ ذرائع کے مطابق ملاقات میں 27 ویں آئینی ترمیم کے مسودے اور بلدیاتی اختیارات پر تفصیلی تبادلہ خیال ہوا۔
وزیراعظم شہباز شریف نے یقین دہانی کرائی کہ ایم کیو ایم کے بلدیاتی مسودے کو ترمیم میں شامل کرنے کی حمایت کی جائے گی۔ ایم کیو ایم ذرائع کا کہنا ہے کہ مسلم لیگ ن پارٹی بلدیاتی مسودے کی مکمل حمایت کرے گی۔
ملاقات کے بعد گورنر سندھ کامران ٹیسوری نے بتایا کہ وزیراعظم نے آئینی ترمیم پر اعتماد میں لیا اور بلدیاتی مسودے کے حوالے سے بھی مشاورت ہوئی۔ حکومتی اتحاد رواں ماہ 27 ویں آئینی ترمیم کو پارلیمنٹ کے دونوں ایوانوں سے منظور کرانے کی تیاری کر رہا ہے۔
بعد ازاں وزیراعظم سے پیپلز پارٹی کے وفد کی ملاقات بھی مکمل ہوئی اور مجوزہ ترمیم کی شقوں پر تفصیلی مشاورت ہوئی۔ پیپلز پارٹی کی سینٹرل ایگزیکٹو کونسل کا اجلاس آج شام کراچی میں ہوگا جس میں پارٹی کے اہم رہنما شرکت کریں گے۔
ذرائع کے مطابق بلوچستان عوامی پارٹی کا وفد بھی وزیراعظم سے ملاقات کرے گا، جس میں صوبائی و قومی اسمبلی نشستوں میں اضافے کا مطالبہ کیا جائے گا۔
