لیونل میسی کے والد جارج میسی 68 برس کی عمر میں چل بسے
لیونل میسی کے والد جارج میسی 68 برس کی عمر میں چل بسے۔ارجنٹائن کے عالمی شہرت یافتہ فٹبالر لیونل میسی کے والد جارج میسی طویل علالت کے بعد 68 برس کی عمر میں چل بسے۔ وہ ہفتے کی صبح ارجنٹائن کے شہر روزاریو کے ایک اسپتال میں زندگی کی بازی ہار گئے۔
جارج میسی کم عمری سے ہی اپنے بیٹے لیونل کے فٹبال کیریئر میں اہم کردار ادا کرتے رہے۔ وہ لیونل میسی کے ایجنٹ بھی تھے اور کئی دہائیوں تک ان کے پیشہ ورانہ سفر میں رہنمائی اور معاونت کرتے رہے۔
میسی خاندان نے اس سے قبل ان کی صحت سے متعلق صورتحال کی تصدیق کی تھی، تاہم بیماری کی نوعیت کے بارے میں تفصیلات سامنے نہیں لائی گئی تھیں۔
جارج میسی نے اپنے بیٹے کے فٹبال سفر کے ابتدائی دور سے ہی ان کا بھرپور ساتھ دیا۔ لیونل میسی نے کم عمری میں روزاریو کے کلب نیویلز اولڈ بوائز سے فٹبال کا آغاز کیا، جبکہ بعد میں خاندان اسپین منتقل ہوگیا اور جارج میسی اپنے بیٹے کے ساتھ بارسلونا میں مقیم رہے۔
لیونل میسی کے شاندار کیریئر میں ان کے والد کا کردار بھی نمایاں رہا۔ میسی نے ارجنٹائن کے ساتھ 2022 میں ورلڈ کپ جیتنے کے علاوہ متعدد انفرادی اور کلب اعزازات حاصل کیے، جن میں آٹھ بیلن ڈی اور ایوارڈز اور چیمپئنز لیگ کی چار ٹرافیاں بھی شامل ہیں۔
میسی کے آبائی کلب نیویلز اولڈ بوائز نے جارج میسی کو خراج عقیدت پیش کرتے ہوئے کہا کہ انہوں نے اپنی اہلیہ سیلیا کے ساتھ مل کر لیونل کے کیریئر کو آگے بڑھانے میں اہم کردار ادا کیا۔
بارسلونا فٹبال کلب نے بھی جارج میسی کو خراج تحسین پیش کیا اور کلب کے ساتھ ان کی وابستگی اور لیونل میسی کے کیریئر کے ابتدائی برسوں میں تعاون پر ان کا شکریہ ادا کیا۔
ارجنٹائن فٹبال ایسوسی ایشن نے بھی جارج میسی کے چل بسنے پر گہرے دکھ اور افسوس کا اظہار کرتے ہوئے لیونل میسی اور ان کے اہل خانہ سے اظہارِ تعزیت کیا ہے۔
دوسری جانب میسی خاندان نے ماضی میں جارج میسی کی صحت اور ذاتی معاملات سے متعلق غیر مصدقہ اطلاعات پر بھی ناراضی کا اظہار کیا تھا اور کہا تھا کہ نجی خاندانی معاملے سے متعلق حساسیت اور احترام کا مظاہرہ کیا جانا چاہیے۔