لاہور تا راولپنڈی ریل کار کے نئے ریک کا افتتاح-پاکستان ریلوے نے لاہور سے راولپنڈی کے درمیان چلنے والی ریل کار کے نئے ریک کا باضابطہ افتتاح کر دیا ہے۔
افتتاحی تقریب میں چیف ایگزیکٹو آفیسر ریلوے عامر علی بلوچ نے شرکت کی اور نئی تیار شدہ بوگیوں کا تفصیلی معائنہ کیا۔
ریلوے حکام کے مطابق ریل کار کے نئے ریک کو دشوار گزار راستوں پر بہتر کارکردگی کے لیے مکمل طور پر ری فربش کیا گیا ہے۔
بوگیوں میں مسافروں کی سہولت کے لیے کھانے پینے کی اشیاء، ابتدائی طبی امداد کی ادویات اور صفائی ستھرائی کا خاص انتظام کیا گیا ہے تاکہ سفر آرام دہ اور محفوظ بنایا جا سکے۔
افتتاح کے موقع پر سی ای او ریلوے عامر علی بلوچ نے کہا کہ ریلوے کی مزید ٹرینوں میں بھی جدید سہولیات فراہم کی جا رہی ہیں۔ ان کا کہنا تھا کہ کھانے پینے سے لے کر صفائی اور طبی امداد تک تمام سہولتوں کو بین الاقوامی معیار کے مطابق بہتر بنایا جا رہا ہے۔
انہوں نے کہا کہ ریل کا سفر آج بھی دیگر ٹرانسپورٹ ذرائع کے مقابلے میں سستا، آرام دہ اور محفوظ ہے۔ ریلوے کا مقصد مسافروں کو جلد اور بحفاظت اُن کی منزل تک پہنچانا ہے۔
عامر بلوچ نے مزید بتایا کہ لوکوموٹیوز اور ٹریکس کی مرمت کا کام جاری ہے جبکہ بین الاقوامی فنانسنگ کے ذریعے ٹریکس کی اپ گریڈیشن بھی کی جا رہی ہے تاکہ مستقبل میں ٹرینوں کی رفتار اور سروس کے معیار میں مزید بہتری لائی جا سکے۔
