ٹیسلا نے راکٹ ٹیکنالوجی سے لیس نئی روڈسٹر متعارف کرا دی-امریکی الیکٹرک گاڑیاں بنانے والی کمپنی ٹیسلا نے راکٹ طرز کے تھرسٹرز سے لیس نئی اسپورٹس کار ’روڈسٹر‘ پیش کردی ہے، جس کے بارے میں کمپنی کا کہنا ہے کہ اس کی پیداوار 2028 میں شروع کرنے کا منصوبہ ہے۔ گاڑی کے خصوصی مظاہرے میں فضا میں بلند ہونے، ہوا میں گھومنے اور دیگر گاڑیوں کے اوپر سے گزرنے جیسے کرتب دکھائے گئے۔
رپورٹ کے مطابق دو نشستوں پر مشتمل سفید رنگ کی نئی روڈسٹر کو ٹیسلا کے چیف ایگزیکٹو ایلون مسک کی خلائی کمپنی اسپیس ایکس کے تعاون سے تیار کیا گیا ہے۔ اس میں نصب خصوصی تھرسٹرز گاڑی کو غیر معمولی حرکات کرنے میں مدد دیتے ہیں، جس کے باعث اس کی رونمائی نے شائقین اور سرمایہ کاروں کی توجہ حاصل کرلی۔
تقریب کے دوران گاڑی نے ایک خصوصی سکشن نظام کی مدد سے ریمپ پر الٹی سمت میں چلنے اور ہوا میں گھومنے کا مظاہرہ کیا۔ اس کے بعد تھرسٹرز کی مدد سے لینڈنگ کی گئی، جبکہ ایک اور مظاہرے میں گاڑی کو ٹرک اور دیگر گاڑیوں کے اوپر سے گزرتے ہوئے دکھایا گیا۔
ٹیسلا کے مداح اور سرمایہ کار ساویر میرٹ نے سماجی رابطے کی ویب سائٹ ایکس پر اس مظاہرے کو اپنی دیکھی ہوئی مصنوعات کی غیر معمولی نمائشوں میں سے ایک قرار دیا۔
ٹیسلا میں گاڑیوں کی انجینئرنگ کے سربراہ لارز موراوی کے مطابق نئی روڈسٹر صفر سے 60 میل فی گھنٹہ، یعنی تقریباً 97 کلومیٹر فی گھنٹہ، کی رفتار ایک سیکنڈ سے بھی کم وقت میں حاصل کرنے کی صلاحیت رکھتی ہے۔
ان کے مطابق گاڑی کی زیادہ سے زیادہ رفتار 230 میل فی گھنٹہ، یعنی تقریباً 370 کلومیٹر فی گھنٹہ سے زیادہ ہوسکتی ہے، جبکہ ایک مرتبہ چارج کرنے پر اس کی ممکنہ رینج 300 میل، یعنی تقریباً 480 کلومیٹر سے زائد بتائی گئی ہے۔
ایلون مسک نے ٹیسلا روڈسٹر کی رونمائی کے دوران گاڑی کو ایک ریمپ سے اُچھالا، جس کے بعد گاڑی ہوا میں قلابازی کھاتے ہوئے بحفاظت زمین پر اُتر گئی۔
یہ گاڑی ٹیسلا اور اسپیس ایکس کے اشتراک سے تیار کی گئی ہے۔ https://t.co/UJs87w7k91— Azhar M Khan (@AzharKhan) October 16, 2026
مارننگ اسٹار کے تجزیہ کار سیٹھ گولڈسٹین کا کہنا ہے کہ نئی روڈسٹر ٹیسلا کی فلیگ شپ اسپورٹس کار ہوگی، جو کمپنی کی جدید انجینئرنگ اور ٹیکنالوجی کی صلاحیتوں کو نمایاں کرے گی۔
ٹیسلا نے دوسری نسل کی روڈسٹر کا ابتدائی نمونہ پہلی مرتبہ 2017 میں پیش کیا تھا اور اس وقت گاڑیوں کی فراہمی 2020 میں شروع کرنے کا منصوبہ بتایا گیا تھا، تاہم مختلف وجوہات کی بنا پر اس منصوبے میں مسلسل تاخیر ہوتی رہی۔
کمپنی کی پہلی روڈسٹر 2008 میں متعارف کرائی گئی تھی اور اس کی فروخت 2012 تک جاری رہی۔ یہ ٹیسلا کی پہلی الیکٹرک گاڑی تھی، جس کی تیاری میں لوٹس ایلیس کا چیسس استعمال کیا گیا تھا۔
دوسری جانب ٹیسلا 21 اکتوبر کو رواں سال کی تیسری سہ ماہی کے مالی نتائج جاری کرے گی۔ تجزیہ کاروں کے مطابق سرمایہ کاروں کی توجہ نئی گاڑی کے مظاہرے کے ساتھ ساتھ کمپنی کے منافع، منافع کی شرح اور نقد بہاؤ کے اعداد و شمار پر بھی مرکوز رہے گی۔
واضح رہے کہ نئی روڈسٹر کی رفتار، رینج اور تھرسٹرز سے متعلق بیان کردہ اعداد و شمار کمپنی کے دعووں پر مبنی ہیں، جبکہ اس کی پیداوار اور صارفین کو فراہمی کے منصوبے پر عمل درآمد آئندہ پیش رفت سے مشروط ہوگا۔
