سوئٹزرلینڈ مذاکرات مکمل،ایرانی وفد وطن واپس روانہ-سوئٹزرلینڈ میں ہونے والے چار فریقی مذاکرات کے اختتام پر ایرانی وفد اپنے ملک واپس روانہ ہوگیا۔
ایرانی سرکاری ذرائع کے مطابق بات چیت کے مختلف ادوار مکمل ہونے کے بعد وفد نے واپسی کا سفر اختیار کیا۔
مذاکرات سے واقف ایک امریکی سفارتی ذریعے نے بتایا کہ فریقین کے درمیان اہم علاقائی اور بین الاقوامی امور پر تفصیلی تبادلۂ خیال ہوا۔ ان کے مطابق آبنائے ہرمز میں تجارتی اور بحری آمدورفت کو جاری رکھنے کے حوالے سے مثبت پیش رفت سامنے آئی ہے۔
ذرائع کا کہنا ہے کہ مذاکرات کے دوران لبنان کی صورتحال بھی زیر بحث رہی، جہاں جنگ بندی کو مؤثر بنانے اور کشیدگی میں کمی کے لیے مختلف تجاویز پر غور کیا گیا۔ اس سلسلے میں رابطوں اور تعاون کے ممکنہ طریقہ کار پر بھی تبادلۂ خیال ہوا۔
امریکی سفارتی ذریعے کے مطابق واشنگٹن نے اپنے مؤقف کا اعادہ کرتے ہوئے آبنائے ہرمز میں بلا رکاوٹ بحری نقل و حرکت کی اہمیت پر زور دیا۔
مذاکرات میں شریک فریقین نے سیاسی قیادت اور تکنیکی ٹیموں کے درمیان مستقبل کے رابطوں کے لیے ایک فریم ورک پر بھی اتفاق کیا۔ ذرائع کے مطابق اجلاس میں شریک تمام فریق پیش رفت پر اطمینان کا اظہار کرتے ہوئے آئندہ رابطے جاری رکھنے پر متفق نظر آئے۔
