تہران: ایرانی پارلیمنٹ کے اسپیکر ڈاکٹر محمد باقر قالیباف نے دعویٰ کیا ہے کہ امریکا کا طیارہ بردار بحری جہاز ابراہم لنکن میدان جنگ سے پیچھے ہٹ گیا ہے۔
عرب میڈیا کے مطابق ڈاکٹر محمد باقر قالیباف کا کہنا تھا کہ ایرانی میزائلوں اور ڈرونز کے ابتدائی حملوں کے بعد امریکی بحری جہاز نے جنگی علاقے سے دوری اختیار کرلی۔ ان کے بقول جس بحری بیڑے کو امریکی اتحادیوں کے دفاع کے لیے تعینات کیا گیا تھا وہ خود اپنے دفاع میں مؤثر ثابت نہیں ہو سکا۔
انہوں نے کہا کہ امریکا کے اتحادیوں کو چاہیے کہ وہ اپنی سلامتی کو سابق امریکی صدر ڈونلڈ ٹرمپ اور اسرائیلی وزیرِاعظم بنیامین نیتن یاہو کے بیانات پر منحصر نہ کریں۔
دوسری جانب امریکا اور اسرائیل کے ایران پر حملوں کے بعد خطے میں کشیدگی میں مسلسل اضافہ ہو رہا ہے اور جنگ ساتویں روز میں داخل ہو چکی ہے۔ ایرانی ذرائع ابلاغ کے مطابق مختلف حملوں میں اب تک ایک ہزار سے زائد افراد جاں بحق ہو چکے ہیں۔
ایرانی میڈیا کے مطابق شیراز میں ہونے والے حالیہ حملوں میں رہائشی علاقے کو نشانہ بنایا گیا جس کے نتیجے میں کم از کم بیس افراد جاں بحق ہوئے۔
ادھر اسرائیلی فوج کا کہنا ہے کہ رات بھر کی کارروائیوں میں ایران کے چھ بیلسٹک میزائل لانچرز کو تباہ کیا گیا جبکہ تین جدید دفاعی نظام بھی نشانہ بنائے گئے۔
ایرانی پاسداران انقلاب نے بھی دعویٰ کیا ہے کہ اصفہان میں اسرائیل کا ہیرون ڈرون مار گرایا گیا، جبکہ لورستان میں امریکی ایم کیو نائن ڈرون اور تہران کے نواح میں ایک اور اسرائیلی ڈرون تباہ کیا گیا۔
خطے میں جاری اس کشیدہ صورتحال کے باعث عالمی سطح پر تشویش میں اضافہ ہو رہا ہے۔
