پاک بحریہ کا اینٹی شپ بیلسٹک میزائل کا کامیاب تجربہ
پاک بحریہ نے اینٹی شپ بیلسٹک میزائل کا کامیاب تجربہ کر لیا ہے۔ آئی ایس پی آر کے مطابق یہ میزائل مکمل طور پر پاکستان میں تیار کیا گیا ہے اور سمندری اور زمینی اہداف کو انتہائی درستگی کے ساتھ نشانہ بنانے کی صلاحیت رکھتا ہے۔
بیان کے مطابق اینٹی شپ بیلسٹک میزائل جدید گائیڈنس سسٹم اور اہم تکنیکی خصوصیات سے مزین ہے، جو اسے دفاعی اعتبار سے ایک مؤثر ہتھیار بناتی ہیں۔ ٹیسٹ فائرنگ کا مشاہدہ نیول چیف ایڈمرل نوید اشرف کے ساتھ سینئر سائنسدانوں اور انجینئروں نے بھی کیا۔
پاک بحریہ کا سمندری اور زمینی اہداف کو نشانہ بنانے والے اینٹی شپ بیلسٹک میزائل کا کامیاب تجربہ۔۔!! pic.twitter.com/4AEEV1IFbp
— Khurram Iqbal (@khurram143) November 25, 2025
آئی ایس پی آر نے کہا کہ یہ کامیاب تجربہ پاکستان کی تکنیکی مہارت اور قومی دفاع کے لیے پاک بحریہ کے مضبوط عزم کا واضح اظہار ہے۔ صدرِ مملکت، وزیراعظم، فیلڈ مارشل اور چیئرمین جوائنٹ چیفس آف اسٹاف کمیٹی نے اس کامیابی پر پاک بحریہ کے یونٹس، سائنسدانوں اور انجینئروں کو مبارک باد دی۔
سروسز چیفس نے بھی اس اہم کارنامے پر شریک یونٹس اور سائنسدانوں کو سراہا اور کامیاب تجربے کو ملکی دفاع کے لیے اہم پیش رفت قرار دیا۔
