اٹلی نے اسرائیل کو 0-3 سے شکست دے دی
اٹلی کے شہر اُدینے میں فیفا ورلڈ کپ 2026 کے کوالیفائنگ میچ کے دوران اٹلی نے اسرائیل کو 0-3 سے شکست دے دی، تاہم میدان کے اندر اور باہر ماحول شدید کشیدہ رہا۔
میچ کے آغاز میں اسرائیلی کھلاڑی آسکر گلوخ نے انان خلیلی کے پاس پر گول کی کوشش کی، مگر اٹلی کے دفاع نے بھرپور مزاحمت کی۔ پہلے ہاف کے اختتام سے قبل اٹلی کو برتری ملی جب ریٹیگوئی کو متان بالٹاکسا کے غیر ضروری چیلنج پر پنالٹی ملی، جسے انہوں نے شاندار انداز میں گول میں تبدیل کر دیا۔
دوسرے ہاف میں اطالوی گول کیپر ڈوناروما نے کئی شاندار سیوز کیے، جبکہ ریٹیگوئی نے ایک اور خوبصورت گول داغ کر اسکور 0-2 کر دیا۔ اختتامی لمحات میں فیڈریکو دیمارکو نے مانسینی کو کراس دیا جس پر اٹلی نے تیسرا گول کر کے اپنی فتح یقینی بنا لی۔
میچ کے دوران 25 ہزار نشستوں والے اسٹیڈیو فریولی میں صرف 10 ہزار سے کم تماشائی موجود تھے، جبکہ اسٹیڈیم کے باہر اسرائیل مخالف مظاہرے کیے گئے۔ اطالوی شہریوں نے فلسطین کے حق میں نعرے لگائے اور اسرائیلی ٹیم کی شرکت پر احتجاج کیا۔
یہ میچ اس وقت بھی خبروں کی زینت بنا جب گزشتہ ماہ یوئیفا نے اسرائیل کو جنگی حالات کے باعث کوالیفائر سے معطل کرنے پر غور کیا تھا۔ اُدینے کے میئر البرٹو فیلیس ڈی ٹونی نے بھی اس میچ کو ملتوی کرنے کا مطالبہ کیا تھا۔
اٹلی کے کوچ گیٹسو نے میچ کے بعد کہا کہ "یہ کھیلنا آسان نہیں تھا، کئی دنوں سے ہم یہی سوچ رہے تھے کہ شاید میچ نہ ہو، لیکن ہم نے تیاری کی اور ایک سنجیدہ ماحول میں کامیابی حاصل کی۔”
یہ فتح اٹلی کے ورلڈ کپ 2026 کے فائنل مرحلے میں پہنچنے کے امکانات کو مضبوط کرتی ہے جبکہ اسرائیل کے لیے یہ شکست ایونٹ سے باہر ہونے کا باعث بنی۔
