پاکستان نے ابھی اپنی بہترین کرکٹ نہیں کھیلی،مائیک ہیسن-ٹیم نے اب تک اچھی کارکردگی دکھائی ہے،لیکن ابھی اپنی بہترین کرکٹ کھیلنا باقی ہے۔
پاکستان کرکٹ ٹیم کے ہیڈ کوچ مائیک ہیسن نے امید ظاہر کی ہے کہ قومی ٹیم سری لنکا کے خلاف فائنل میں اپنی بہترین صلاحیتوں کا مظاہرہ کرے گی۔ ان کا کہنا ہے کہ ٹیم نے اب تک اچھی کارکردگی دکھائی ہے، لیکن ابھی اپنی بہترین کرکٹ کھیلنا باقی ہے۔
مائیک ہیسن نے بتایا کہ پاکستان اور سری لنکا کے درمیان سہ ملکی سیریز کا فائنل ہفتے کو لاہور کے قذافی اسٹیڈیم میں کھیلا جائے گا۔ قومی ٹیم مسلسل تین میچز جیت کر فیصلہ کن مرحلے تک پہنچی ہے۔
ہیڈ کوچ کے مطابق اہم کھلاڑیوں کی جانب سے بڑی اننگز سامنے نہ آنے کے باوجود مسلسل فتوحات حاصل کرنا حوصلہ افزا ہے۔ انہوں نے گزشتہ دو ہفتوں کے دوران ٹیم کی مجموعی کارکردگی پر اطمینان کا اظہار بھی کیا۔
مائیک ہیسن نے کہا کہ پاکستان کے ٹاپ آرڈر میں دو ایسے بلے باز موجود ہیں جن کا شمار ملکی کرکٹ کے نمایاں کھلاڑیوں میں ہوتا ہے۔ بڑے کھلاڑیوں سے اہم مقابلوں میں بہترین کارکردگی کی توقع کی جاتی ہے، اس لیے فائنل میں انہیں میچ جتوانے والی اننگز کھیلنے کا موقع حاصل ہوگا۔
انہوں نے مڈل آرڈر میں سلمان علی آغا کی کارکردگی کو سراہتے ہوئے کہا کہ وہ مسلسل اچھا کھیل پیش کر رہے ہیں، جبکہ حسن نواز کی بیٹنگ میں بھی بہتری دکھائی دے رہی ہے۔
بولنگ کے شعبے پر بات کرتے ہوئے مائیک ہیسن نے کہا کہ کپتان شاہین شاہ آفریدی کی جانب سے ابتدائی اوورز میں وکٹیں حاصل کرنا ٹیم کے لیے اہم ہے۔ نسیم شاہ اور حارث رؤف نے بھی ٹورنامنٹ میں اچھی بولنگ کی ہے۔
ہیڈ کوچ نے نوجوان کرکٹر عرفات منہاس کی کارکردگی میں بہتری کو بھی خوش آئند قرار دیا۔ ان کا کہنا تھا کہ سری لنکا کے خلاف آخری لیگ میچ میں پاکستانی ٹیم کی بیٹنگ توقعات کے مطابق نہیں رہی، تاہم انہیں امید ہے کہ کھلاڑی فائنل میں بہتر کھیل پیش کریں گے۔
شائقین کرکٹ کی حمایت کا ذکر کرتے ہوئے مائیک ہیسن نے کہا کہ لاہور اور راولپنڈی کے تماشائیوں نے پوری سیریز کے دوران ٹیم کی بھرپور حوصلہ افزائی کی ہے۔ انہیں امید ہے کہ فائنل میں بھی شائقین کو معیاری اور دلچسپ کرکٹ دیکھنے کو ملے گی۔
