دورہ انگلینڈ،بابر اعظم کو میڈیا سے دور رکھنے کی تجویز
دورہ انگلینڈ،بابر اعظم کو میڈیا سے دور رکھنے کی تجویز-پاکستان کرکٹ ٹیم انگلینڈ کے دورے پر پہنچ چکی ہے، جہاں قومی ٹیم کو تین ٹیسٹ میچز پر مشتمل سیریز میں انگلینڈ کا سامنا کرنا ہے۔ سیریز کے دوران کپتان بابر اعظم کی کارکردگی اور قیادت پر خصوصی توجہ متوقع ہے۔
سابق پاکستانی کپتان اور وکٹ کیپر بیٹر راشد لطیف نے قومی ٹیم کی مینجمنٹ کو مشورہ دیا ہے کہ انگلینڈ کے دورے کے دوران بابر اعظم کو غیر ضروری میڈیا سرگرمیوں سے قدرے دور رکھا جائے۔
راشد لطیف کے مطابق انگلینڈ کا دورہ پاکستان سمیت کسی بھی مہمان ٹیم کے لیے آسان نہیں ہوتا، جبکہ مقامی میڈیا کی جانب سے کھلاڑیوں سے مسلسل سوالات اور تبصرے بعض اوقات اضافی دباؤ کا باعث بن سکتے ہیں۔
انہوں نے تجویز دی کہ بابر اعظم کے بجائے شان مسعود کو انگلش میڈیا کے سامنے زیادہ مواقع دیے جائیں، کیونکہ شان مسعود انگلینڈ میں کرکٹ کھیلنے کا تجربہ رکھتے ہیں اور وہاں کے میڈیا ماحول سے بھی اچھی طرح واقف ہیں۔
سابق کپتان کا کہنا تھا کہ شان مسعود کے علاوہ امام الحق اور محمد عباس بھی میڈیا سے گفتگو کے لیے مناسب انتخاب ہو سکتے ہیں۔
راشد لطیف نے بابر اعظم کو ایک تجربہ کار کرکٹر قرار دیتے ہوئے کہا کہ کپتان کو اپنی تمام تر توجہ ٹیم کی تیاری، حکمت عملی اور میدان میں کارکردگی پر مرکوز رکھنی چاہیے۔
پاکستان اور انگلینڈ کے درمیان ٹیسٹ سیریز کے دوران بابر اعظم کی بیٹنگ اور کپتانی قومی ٹیم کے لیے انتہائی اہم ہوگی، جبکہ انگلینڈ کے مشکل حالات میں پاکستانی کھلاڑیوں کو سخت چیلنج کا سامنا کرنا پڑ سکتا ہے۔