ایران نے اپنے جدید ترین بیلسٹک میزائل خرمشہر فور کا کامیاب تجربہ کر لیا ہے۔ ایرانی میڈیا کے مطابق خرمشہر 4 بیلسٹک میزائل دو ہزار کلومیٹر تک ہدف کو نشانہ بنانے کی صلاحیت رکھتا ہے
اور اس میں پندرہ سو کلوگرام وزنی وارہیڈ نصب کیا جا سکتا ہے۔ میزائل کے حالیہ تجربے کو ایران کی دفاعی صلاحیتوں میں ایک اہم پیش رفت قرار دیا جا رہا ہے۔
دوسری جانب امریکا ایران کے ساتھ جاری ممکنہ مذاکرات میں بیلسٹک میزائل پروگرام کو بھی ایجنڈے میں شامل کرنے پر زور دے رہا ہے، جبکہ ایرانی حکام کا مؤقف ہے کہ بات چیت کو صرف جوہری معاملات تک محدود رکھا جائے۔ وائٹ ہاؤس کے ترجمان کے مطابق صدر ڈونلڈ ٹرمپ عمان میں ہونے والے امریکا، ایران مذاکرات پر گہری نظر رکھے ہوئے ہیں۔ ترجمان کا کہنا ہے کہ ان مذاکرات کا مقصد یہ جانچنا ہے کہ آیا ایران کے ساتھ کسی ممکنہ معاہدے تک پہنچا جا سکتا ہے یا نہیں۔
