آزاد کشمیر اور جی بی میں100آئی ٹی پارکس قائم کر دیے۔ خصوصی مواصلاتی ادارہ ( ایس سی او ) نے آزاد کشمیر اور گلگت بلتستان میں 100 جدید آئی ٹی پارکس قائم کر دیے ہیں ،
جو صرف دو سال کی ریکارڈ مدت میں مکمل ہوئے۔ یہ کامیابی نہ صرف ایس سی او کی تکنیکی صلاحیت کا ثبوت ہے بلکہ خطے میں نوجوانوں کے لیے ایک نیا ڈیجیٹل باب بھی ثابت ہو رہی ہے۔ایس سی او کی رپورٹ کے مطابق، وژن 2025 کے تحت اب تک 700 سے زائد افراد کو براہِ راست روزگار فراہم کیا گیا ہے، جبکہ 1500 فری لانسرز کو ڈیجیٹل مارکیٹ میں کام کرنے کے لیے تربیت اور سہولت فراہم کی گئی ہے۔ یہ پروگرام نوجوانوں کو انفارمیشن ٹیکنالوجی کے میدان میں آگے بڑھنے کے مواقع فراہم کر رہا ہے، جس سے خطے میں ڈیجیٹل معیشت کے فروغ میں نمایاں پیش رفت ہو رہی ہے۔ایس سی او وژن 2025 کے تحت پاکستان کا پہلا خواتین کے لیے مخصوص سافٹ ویئر ٹیکنالوجی پارک مظفرآباد میں قائم کیا گیا ہے۔ اس پارک میں خواتین آئی ٹی ماہرین اور فری لانسرز کو محفوظ، سازگار اور جدید سہولیات سے آراستہ ماحول فراہم کیا گیا ہے۔ ڈی جی ایس سی او کے مطابق، اس اقدام کا مقصد خواتین کو ٹیکنالوجی کے شعبے میں فعال کردار دینے اور صنفی مساوات کو فروغ دینا ہے۔ایس سی او نے خصوصی افراد کے لیے خودمختار رہائشی مراکز بھی قائم کیے ہیں، تاکہ وہ سماجی اور معاشی طور پر خود انحصاری حاصل کر سکیں۔ وژن 2025 کے تحت ہونے والی آئی ٹی سرگرمیوں سے اب تک تقریبا 20 ملین ڈالر کا غیر ملکی زرمبادلہ حاصل ہوا ہے، جو ملکی معیشت کے استحکام میں مثبت کردار ادا کر رہا ہے۔ڈی جی ایس سی او کے مطابق، ایس سی او وژن 2025 کا بنیادی مقصد نوجوانوں کو ہنر مند بنانا، ٹیکنالوجی کے ذریعے خطے کی ترقی کو تیز کرنا اور گلگت بلتستان و آزاد کشمیر میں آئی ٹی انقلاب برپا کرنا ہے۔ ان کا کہنا تھا کہ یہ آئی ٹی پارکس نوجوانوں کو بااختیار بنانے کے ساتھ ساتھ کاروبار، تعلیم اور رابطے کے نئے دروازے کھول رہے ہیں۔سیاسی و سماجی ماہرین کے مطابق، ایس سی او کا وژن 2025 پاکستان کے شمالی علاقوں میں ڈیجیٹل ترقی، انسانی وسائل کی مضبوطی اور جدید ٹیکنالوجی کی بنیاد رکھنے کی سمت ایک عملی قدم ہے، جو آنے والے برسوں میں خطے کے معاشی منظرنامے کو یکسر بدل سکتا ہے۔
