بگرام ایئربیس واپس نہ دینے پر ٹرمپ کی دھمکی
امریکی صدر ڈونلڈ ٹرمپ نے خبردار کیا ہے کہ اگر افغانستان نے بگرام ایئربیس امریکا کے حوالے نہ کی تو اس کے سنگین نتائج برآمد ہوں گے۔
سوشل میڈیا پلیٹ فارم "ٹروتھ سوشل” پر جاری بیان میں ٹرمپ نے کہا کہ بگرام ایئربیس امریکا نے تعمیر کی تھی اور اگر اسے واپس نہیں کیا گیا تو یہ انتہائی نقصان دہ ہوگا۔
امریکی میڈیا کے مطابق، امریکا اور طالبان کے درمیان انسداد دہشت گردی کے اقدامات پر مذاکرات جاری ہیں، جن میں بگرام ایئربیس پر محدود امریکی فوج کی تعیناتی کا بھی امکان زیر غور ہے۔ ان مذاکرات کی سربراہی امریکی نمائندہ خصوصی ایڈم بوہلر کر رہے ہیں۔
ٹرمپ ماضی میں بھی یہ مؤقف اختیار کر چکے ہیں کہ امریکا کو بگرام ایئربیس کبھی نہیں چھوڑنی چاہیے تھی۔ ان کے مطابق یہ فوجی اڈہ اس لیے بھی اہم ہے کیونکہ یہ اُس مقام سے محض ایک گھنٹے کی مسافت پر ہے جہاں چین اپنے ایٹمی ہتھیار تیار کرتا ہے۔
گزشتہ دنوں برطانیہ کے دورے پر وزیراعظم کیئر اسٹارمر کے ہمراہ پریس کانفرنس کے دوران ٹرمپ نے انکشاف کیا کہ امریکا طالبان کو بگرام ایئربیس مفت میں دے بیٹھا تھا، لیکن اب اسے واپس لینے کی کوشش جاری ہے۔ ٹرمپ کی اس بات پر برطانوی وزیراعظم حیرت زدہ رہ گئے اور ان کے تاثرات واضح طور پر بدل گئے۔
