پاکستان کی کامیاب سفارتکاری کے نتیجے میں خطے میں کشیدگی کم ہونے لگی ہے، جہاں ایران نے بھی عارضی جنگ بندی پر رضامندی ظاہر کر دی ہے۔
میڈیا رپورٹس کے مطابق ایران نے پاکستان کی جانب سے دی گئی دو ہفتوں کی جنگ بندی کی تجویز قبول کر لی ہے، جبکہ ایرانی قیادت نے بھی اس فیصلے کی منظوری دے دی ہے۔ اس پیش رفت کو خطے میں امن کے لیے اہم قدم قرار دیا جا رہا ہے۔
ایرانی ذرائع کا کہنا ہے کہ اگر ایران پر حملے بند کیے جاتے ہیں تو ایران بھی جوابی کارروائیاں روکنے پر تیار ہے۔ ایرانی وزیر خارجہ عباس عراقچی کے مطابق حالات کو بہتر بنانے کے لیے سفارتی رابطے جاری ہیں، جبکہ آبنائے ہرمز میں آئندہ دو ہفتوں کے دوران محفوظ ٹرانزٹ کو یقینی بنانے کی کوشش کی جا رہی ہے۔
دوسری جانب امریکی حکام کے مطابق ایران کے خلاف جاری فوجی کارروائیاں عارضی طور پر روک دی گئی ہیں، جو جنگ بندی معاہدے کا حصہ ہیں۔ امریکی صدر ڈونلڈ ٹرمپ نے بھی دو ہفتوں کے لیے جنگ بندی کا اعلان کیا ہے تاکہ مذاکرات کے ذریعے مستقل حل تلاش کیا جا سکے۔
رپورٹس میں یہ بھی بتایا گیا ہے کہ اسرائیل نے بھی عارضی جنگ بندی پر اتفاق کر لیا ہے، جس کی تصدیق اسرائیلی میڈیا اور وائٹ ہاؤس کے عہدیداروں نے کی ہے۔
تجزیہ کاروں کے مطابق یہ پیش رفت مشرق وسطیٰ میں دیرپا امن کی جانب ایک اہم قدم ثابت ہو سکتی ہے، جہاں سفارتی کوششیں میدانِ جنگ کی جگہ لے رہی ہیں۔
