ٹی 20ورلڈکپ،پاکستان کا نیدرلینڈز کیخلاف ٹاس جیت کر پہلے بولنگ کا فیصلہ
کولمبو: آئی سی سی ٹی ٹوئنٹی ورلڈکپ کے پہلے میچ میں پاکستان نے نیدرلینڈز کے خلاف ٹاس جیت کر پہلے بولنگ کرنے کا فیصلہ کیا ہے۔ ٹاس کے بعد کپتان سلمان علی آغا نے کہا کہ سری لنکا میں پہلی بار اس طرح کی پِچ دیکھی ہے اور ٹیم میں موجود تین فاسٹ بولرز کے ساتھ پلان کے مطابق کھیلنے کی کوشش کریں گے۔
آج کے میچ کے لیے پاکستان کی ٹیم میں صاحبزادہ فرحان، صائم ایوب، سلمان علی آغا، بابر اعظم، عثمان خان، شاداب خان، محمد نواز، فہیم اشرف، شاہین آفریدی، سلمان مرزا اور ابرار احمد شامل ہیں۔
ٹی ٹوئنٹی ورلڈکپ میں 20 ٹیموں کو چار گروپوں میں تقسیم کیا گیا ہے، جس میں پاکستان گروپ اے میں بھارت، بنگلادیش، نمیبیا، نیدرلینڈز اور امریکہ کے ساتھ شامل ہے۔ پاکستان نے 15 فروری کو کولمبو میں بنگلادیش کے خلاف میچ کھیلنے سے یکجہتی کے طور پر انکار کر رکھا ہے۔
تاریخی حوالوں کے مطابق پاکستان نے 2009 میں یونس خان کی قیادت میں انگلینڈ میں ٹی ٹوئنٹی ورلڈکپ کا ٹائٹل جیتا تھا۔ 2007 میں جنوبی افریقہ میں پاکستان رنر اپ رہا جبکہ بھارت نے ٹائٹل حاصل کیا۔ 2022 میں بابر اعظم کی قیادت میں پاکستان فائنل میں انگلینڈ سے ہارا۔
سلمان علی آغا اب تک 43 ٹی ٹوئنٹی میچز میں پاکستان کی کپتانی کر چکے ہیں، جن میں سے 27 میں پاکستان نے فتح حاصل کی۔ ایشیا کپ 2025 کے بعد 13 ٹی ٹوئنٹی میچز میں پاکستان نے 10 میں کامیابی حاصل کی ہے۔ پاکستان نے حال ہی میں آسٹریلیا کے خلاف تین میچز کی سیریز میں کلین سوئپ کیا تھا۔
