ترکیہ کے چیف آف جنرل اسٹاف نے جمعہ کے روز جنرل ہیڈکوارٹرز کا دورہ کیا جہاں انہوں نے چیف آف ڈیفنس فورسز اور چیف آف آرمی اسٹاف فیلڈ مارشل سید عاصم منیر سے ملاقات کی۔ جی ایچ کیو آمد پر ترک جنرل کو پاک فوج کے چاق و چوبند دستے نے گارڈ آف آنر پیش کیا۔
آئی ایس پی آر کے مطابق ملاقات کے دوران دفاعی اور عسکری امور، باہمی دلچسپی کے معاملات کے علاوہ علاقائی اور عالمی سیکیورٹی صورتحال پر تفصیلی تبادلہ خیال کیا گیا۔ دونوں ممالک نے پاک ترکیہ دفاعی اور فوجی تعاون کو مزید مستحکم بنانے پر اتفاق کیا۔
ملاقات میں قریبی رابطوں اور باہمی تعاون کو فروغ دینے پر زور دیا گیا۔ فیلڈ مارشل سید عاصم منیر نے پاکستان اور ترکیہ کے برادرانہ تعلقات کو اجاگر کرتے ہوئے ترک مسلح افواج کے تعاون کو سراہا۔
ترکیہ کے چیف آف جنرل اسٹاف نے شاندار میزبانی پر پاکستان کا شکریہ ادا کیا اور تربیت، مشترکہ مشقوں اور استعداد کار بڑھانے کے لیے تعاون جاری رکھنے کے عزم کا اظہار کیا۔
