لندن میں سابق معاون خصوصی برائے احتساب شہزاد اکبر نے نامعلوم شخص کے حملے کے بعد بیان جاری کرتے ہوئے کہا ہے کہ سوشل میڈیا پر زیر گردش ان کی زخمی چہرے والی تصویر جعلی اور اے آئی سے تیار کی گئی ہے۔
شہزاد اکبر نے بتایا کہ حملے کے نتیجے میں ان کی ناک کی ہڈی ٹوٹ گئی اور چہرے پر زخم آئے۔ پولیس اس وقت سرگرمی کے ساتھ حملہ آور کی تلاش میں مصروف ہے اور یقین دلایا گیا ہے کہ حملہ آور اور اس کے پیچھے موجود افراد کو گرفتار کیا جائے گا۔
انہوں نے کہا کہ تفتیش کی وجہ سے سی سی ٹی وی فوٹیج یا تصاویر شیئر نہیں کی جا سکتیں، اور وہ برطانوی قانون پر مکمل اعتماد رکھتے ہیں۔ شہزاد اکبر نے حکومت سے اپیل کی کہ انگلینڈ کو سب کے لیے محفوظ بنایا جائے، بشمول ان افراد کے جو ان سے اختلاف رکھتے ہیں۔
شہزاد اکبر کے مطابق حملہ آور کنسٹرکشن ورکر یا کوڑا اٹھانے والا لگتا تھا، اور اس نے ان کے نام کی تصدیق کے بعد حملہ کیا۔ انہوں نے واضح کیا کہ اس بزدلانہ حرکت سے ان کا حوصلہ نہیں ٹوٹے گا اور عزم پہلے سے زیادہ مضبوط ہوا ہے۔
شہزاد اکبر نے کہا کہ وہ پاکستان میں بدعنوانی، انسانی حقوق کی خلاف ورزیوں اور جمہوریت مخالف کوششوں کو بے نقاب کرتے رہیں گے۔
