گھوٹکی میں بس سے اغوا کیے گئے تمام مسافر بازیاب
سندھ کے ضلع گھوٹکی کے علاقے کشمور میں صادق آباد سے کوئٹہ جانے والی مسافر بس سے اغوا کیے گئے تمام 14 مسافروں کو بازیاب کرا لیا گیا ہے۔
ڈپٹی سپرنٹنڈنٹ آف پولیس (ڈی ایس پی) اباڑو عبدالقادر کے مطابق مغوی مسافروں کی تعداد کے حوالے سے ابتدائی طور پر کنڈکٹر درست معلومات فراہم نہیں کر سکا تھا، تاہم تحقیقات کے بعد تصدیق ہوئی کہ ڈاکوؤں نے 19 نہیں بلکہ 14 مسافروں کو اغوا کیا تھا۔
ڈی ایس پی عبدالقادر نے بتایا کہ اغوا کیے گئے 14 مسافروں میں سے 13 کو زندہ بازیاب کرا لیا گیا ہے، جبکہ ایک مسافر واردات کے دوران دل کا دورہ پڑنے سے جاں بحق ہو گیا، جس کی لاش بھی برآمد کر لی گئی ہے۔
پولیس کے مطابق بازیابی کے لیے کیے گئے آپریشن کے دوران ڈاکوؤں کی جانب سے شدید مزاحمت کی گئی۔ اس دوران ڈاکوؤں نے پولیس کی بکتر بند گاڑی پر راکٹ بھی فائر کیے، جس کے نتیجے میں ایک پولیس اہلکار زخمی ہوا۔
واقعے کے بعد علاقے میں سرچ آپریشن جاری ہے اور فرار ہونے والے ملزمان کی گرفتاری کے لیے مزید کارروائیاں کی جا رہی ہیں۔
