اسرائیلی فوجیوں کی درندگی دکھانے پرملٹری وکیل گرفتار
اسرائیلی فوج کی سابق اعلیٰ عہدیدار اور ملٹری وکیل میجر جنرل یفات تومر یروشلمی کو فلسطینی قیدی پر تشدد کی ویڈیو لیک کرنے کے الزام میں گرفتار کرلیا گیا۔
رپورٹس کے مطابق یہ وہ ویڈیو تھی جس میں اسرائیلی فوجیوں کو ایک فلسطینی قیدی پر تشدد کرتے ہوئے دکھایا گیا تھا۔ ویڈیو منظرِ عام پر آنے کے بعد اسرائیل میں شدید ہنگامہ برپا ہوگیا تھا۔
میجر جنرل یفات تومر نے گزشتہ ہفتے اسرائیلی ڈیفنس فورسز (IDF) میں چیف لیگل ایڈوائزر کے عہدے سے استعفیٰ دیا تھا اور ویڈیو لیک کے معاملے کی ذمہ داری قبول کی تھی۔
ان کی اچانک گمشدگی کے بعد پولیس نے تل ابیب کے ساحلی علاقے سے انہیں تلاش کرلیا اور بعدازاں حراست میں لے لیا۔
بی بی سی کے مطابق یہ واقعہ اسرائیل میں سیاسی تقسیم کی نئی علامت بن گیا ہے۔ دائیں بازو کے حلقے اسے فوج سے ’غداری‘ قرار دے رہے ہیں، جبکہ بائیں بازو کے ناقدین کے مطابق جنرل یروشلمی نے پہلی بار سچ سامنے لا کر اپنے عہدے کا حق ادا کیا۔
اقوام متحدہ کی ایک رپورٹ کے مطابق غزہ سے گرفتار کیے گئے فلسطینی مرد، خواتین اور بچوں کو اسرائیلی حراستی مراکز میں جسمانی و نفسیاتی تشدد اور جنسی اذیت کا نشانہ بنایا گیا — جو جنگی جرائم کے زمرے میں آتا ہے۔
