وائٹ ہاؤس میں صحافیوں کے داخلے پر سخت پابندیاں نافذ
امریکی صدر دفتر وائٹ ہاؤس نے صحافیوں کے داخلے کے لیے نئے اصول لاگو کرتے ہوئے پالیسی مزید سخت کر دی ہے۔
غیر ملکی میڈیا رپورٹس کے مطابق اب صحافی پریس سیکرٹری اور دیگر اعلیٰ حکام کے دفاتر میں بغیر اجازت داخل نہیں ہو سکیں گے، جبکہ "اپر پریس روم” میں داخلہ صرف پیشگی اپائنٹمنٹ کے ذریعے ممکن ہوگا۔
اعلامیے کے مطابق نئی پالیسی فوری طور پر نافذ العمل ہوگی۔ حکام کا کہنا ہے کہ یہ اقدام حساس معلومات کے تحفظ کو یقینی بنانے کے لیے اٹھایا گیا ہے۔
ذرائع کے مطابق، گزشتہ ماہ پینٹاگون میں بھی اسی نوعیت کی پابندیاں نافذ کی گئی تھیں، جس کے بعد وائٹ ہاؤس کا یہ فیصلہ میڈیا رسائی سے متعلق ایک اور اہم تبدیلی تصور کیا جا رہا ہے۔
