ایس پی عدیل اکبر آبائی گاؤں میں سپرد خاک
گوجرانوالہ: ایس پی عدیل اکبر، جو چند روز قبل فائرنگ کے ایک افسوسناک واقعے میں شہید ہوگئے تھے، کو ان کے آبائی گاؤں میں سپردِ خاک کر دیا گیا۔ نمازِ جنازہ میں آئی جی اسلام آباد سید علی ناصر رضوی، سی پی او گوجرانوالہ محمد ایاز سلیم، دیگر پولیس افسران، اہلکاروں اور اہلِ علاقہ کی بڑی تعداد نے شرکت کی۔
یہ بھی پڑھیں:۔ ایس پی عدیل اکبر کی نمازِ جنازہ ادا
گزشتہ روز اسلام آباد پولیس کے ایس پی عدیل اکبر نے مبینہ طور پر خود کو گولی مار کر زندگی کا خاتمہ کر لیا۔
پولیس ذرائع کے مطابق ایس پی عدیل اکبر نے گن مین سے بندوق لے کر خود پر فائر کیا۔ انہیں شدید زخمی حالت میں پمز اسپتال منتقل کیا گیا، تاہم وہ جانبر نہ ہو سکے۔
ذرائع کے مطابق ایس پی عدیل اکبر اسلام آباد پولیس میں بطور ایس پی انڈسٹریل ایریا خدمات سرانجام دے رہے تھے۔
واقعے سے کچھ دیر قبل وہ حاجی کیمپ اسلام آباد میں سکیورٹی انتظامات کا جائزہ لے رہے تھے۔
اسلام آباد پولیس کے ایکس (سابق ٹوئٹر) اکاؤنٹ پر ان کے دورے کی تصاویر اور تفصیلات بھی پوسٹ کی گئی تھیں، جن میں بتایا گیا تھا کہ انہوں نے ڈیوٹی پر موجود اہلکاروں سے ملاقات کی، سکیورٹی انتظامات کا معائنہ کیا اور افسران کو الرٹ رہنے کی ہدایت دی۔
پولیس ذرائع کے مطابق عدیل اکبر کا تعلق ضلع گجرات سے تھا اور وہ پولیس سروس آف پاکستان کے 46ویں کامن کے افسر تھے۔
سی ایس ایس امتحان میں وہ اپنے بیچ کے ٹاپر قرار پائے تھے۔
ذرائع نے بتایا کہ عدیل اکبر کو تین روز قبل ڈینگی بخار کی تشخیص ہوئی تھی، مگر اس کے باوجود وہ مسلسل ڈیوٹی انجام دیتے رہے۔
انہوں نے طبی خرابی کے باعث متعدد مرتبہ چھٹی کے لیے درخواست دی تھی۔
ایس پی عدیل اکبر کی ایک سالہ ننھی بیٹی بھی ہے۔
وفاقی پولیس کے اعلیٰ حکام نے اس واقعے پر گہرے رنج و غم کا اظہار کیا ہے، جبکہ واقعے کی تحقیقات جاری ہیں۔
ایس پی عدیل اکبر کی تدفین انکے آبائی گاؤں میں کر دی گئی۔ آئی جی اسلام آباد سید علی ناصر رضوی، سی پی او گوجرانولہ محمد ایاز سلیم، پولیس افسران اور اہل علاقہ کی بڑی تعداد میں شرکت۔ آئی جی اسلام آباد کی مرحوم کے اہلخانہ سے تعزیت اور ادارے کی جانب سے ہر ممکن تعاون کی یقین دہانی۔… pic.twitter.com/G9TAhRPAZG
— Islamabad Police (@ICT_Police) October 24, 2025
آئی جی اسلام آباد نے مرحوم کے اہلِ خانہ سے تعزیت کا اظہار کرتے ہوئے کہا کہ عدیل اکبر ایک باہمت، نڈر اور فرض شناس افسر تھے، ان کی خدمات کو ہمیشہ یاد رکھا جائے گا۔ انہوں نے اہلِ خانہ کو یقین دلایا کہ پولیس ادارہ اس مشکل گھڑی میں ان کے ساتھ ہے
یہ بھی پڑھیں:۔ اسلام آباد پولیس کے ایس پی عدیل اکبر نے مبینہ طور پر خودکشی کرلی
شرکاء نے ایس پی عدیل اکبر کی بہادری کو خراجِ عقیدت پیش کیا اور ان کے ایصالِ ثواب کے لیے خصوصی دعا کی۔
