DGISPRنے خارجیوں کے سہولت کاروں کو تین آپشن دیدیے
پشاور، پاک فوج کے ترجمان لیفٹیننٹ جنرل احمد شریف چوہدری نے پشاور میں ایک پریس کانفرنس میں کہا ہے کہ خارجی عناصر کے سہولت کاروں کے لیے اب روایتی رویہ قابل قبول نہیں رہے گا اور ان کے پاس تین واضح راستے موجود ہیں۔ انھوں نے واضح کیا کہ ریاست امن و امان کے تحفظ اور عوام کی حفاظت کے لیے ضروری اقدامات کرے گی۔
یہ بھی پڑھیں:۔ اورکزئی،سیکیورٹی فورسز کا آپریشن،11جوان شہید،19دہشتگرد ہلاک
ترجمان نے سہولت کاروں کے لیے جو آپشنز بتائے اُن کے مطابق پہلا راستہ یہ ہے کہ سہولت کار اپنی ذمہ داری قبول کریں اور خارجی عناصر کو ریاست کے حوالے کر دیں۔ دوسرا آپشن یہ ہے کہ وہ دہشت گردی کے خلاف جاری کارروائیوں میں ریاستی اداروں کے ساتھ تعاون کریں اور اس ناسور کو اس کے انجام تک پہنچانے میں مدد کریں۔ اگر وہ دونوں میں سے کسی بھی راستے کا انتخاب نہیں کرتے تو اُنہیں ریاست کی کارروائی کے لیے تیار رہنا چاہیے — یہ تیسرا متبادل ہے جسے جنرل احمد شریف نے خبردار کن لہجہ میں پیش کیا۔
انہوں نے مزید کہا کہ امید ہے کہ خیبر پختونخوا کے عوام اور صوبائی ادارے اپنی سکیورٹی کے فرائض خود سنبھالیں گے اور افغانستان سے سکیورٹی کی امداد یا سہولت طلب کرنے کے بجائے مقامی سطح پر احتیاطی اور حفاظتی اقدامات کو مضبوط کریں گے۔
